A sa dame - Poéme

Jeune, gente, plaisant et débonnaire,
Par un prier, qui vault commandement,
Chargié m'avez d'une balade faire.
Si l'ay faicte de cueur joyeusement ;
Or la vueilliez recevoir doulcement.
Vous y verres, s'il vous plaist a la lire,
Le mal que j'ay, combien que vrayement
J'aymasse mieulx de bouche le vous dire.



Vostre douleur m'a sceu si bien atraire
Que tout vostre je suis entièrement,
Tresdesirant de vous servir et plaire.
Mais je seuffre maint doloreux tourment,
Quant à mon gré je ne vous voy souvent,
Et me desplaist quant me fault vous escrire
Car se faire ce povoit autrement,
J'aymasse mieulx de bouche le vous dire.



C'est par
Dangier, mon cruel adversaire,
Qui m'a tenu en ses mains longuement ;
En tous mes fais je le treuve contraire,
Et plus se rit quant plus me voit dolent.
Se vouloye raconter plainnement
En cest escript mon ennuieux martire,
Trop long seroit ; pour ce certainement
J'aymasse mieulx de bouche le vous dire.