Sonnet xlii - Sonnet

Auprès de ce beau teinct, le lys en noir se change,
Le laict est bazané auprès de ce beau teinct,
Du signe la blancheur auprès de vous s'esteinct
Et celle du papier ou est vostre louange.



Le sucre est blanc, et lorsqu'en la bouche on le range
Le goust plaist, comme fait le lustre qui le peinct
Plus blanc est l'arsenic, mais c'est un lustre feinct,
Car c'est mort, c'est poison à celuy qui le mange.



Vostre blanc en plaisir taint ma rouge douleur
Soyez douce du goust, comme belle en couleur,
Que mon espoir ne soit dementy par l'espreuve,



Vostre blanc ne soit point d'aconite noircy,
Car ce sera ma mort, belle, si je vous treuve
Aussi blanche que neige, et froide tout ainsi.