Qui bien aime n'oublie pas - Ballade

Mon bel ami, je voy trop bien

De vray, quel que le semblant soit,

Que vostre cuer ne m'aime en rien.

Bien borgnes est qui ne le voit;

Vous le dites quoy qu'il en soit,

Mais c'est tout pour moy faire pestre,


Car l'oeuvre loe le maistre.



Il appert a vostre maintien

Comment vo cuer d'amer recroit;

Car tout un moys, si com je tien,

De moy veoir ne vous chauldroit.

Que m'amissiez qui le croiroit?

Certes, ce ne pourroit estre,


Car l'oeuvre loe le maistre.



Dont trop pour fole je me tien,

Et aussi chascun m'i tendroit,

De vous amer; car nesun bien

De ce venir ne me pourroit,

Puis qu'en riens ne vous en seroit,

Et j'aperçoy trop bien vostre estre;


Car l'oeuvre loe le maistre.